مؤخرا حدث تغيير كبير في ثقافة الإدمان، أحكي لك مثالا:
الأول لشاب في كلية يتمناها ملايين الشباب في مصر، الشاب كويس جدا ومن أسرة كويسة جدا، ومر بتجربة الإدمان في سن مبكرة جدا، والحمد لله اتعالج ودخل الكلية وبَقى ناجح وفخر لعيلته..
من فترة ابتدى الشاب ياخد مادة جديدة اسمها “بودر”
وليس بودرة!
شبه الاستروكس والفودو..
بسأله اشمعنا المادة دي؟
قالي بتعجبني دماغها،
قلت له اوصف لي الدماغ بتاعتها!
قالي الدماغ تقيلة، وبحس كأني بحلم وبفصل، وبيعجبني الفصلان بتاعها!
بقوله طيب وليه مش الحشيش طالما قررت ترجع للمخدرات؟
قالي دماغ الحشيش خفيفة، وانا بقيت بحب الدماغ التقيلة والفصلان بتاعها!
بيقولي وانا باخدها ببقى غبي جدا وبتخانق مع أصحابي على أتفه سبب، وشكلي بيبقى غريب!
قلت له تأثيرها بيقعد قد إيه؟
قالي نصف ساعة.
قلت له وبترجع تكرر التجربة دي كام مرة؟
قالي ممكن ٥-٦ وأحيانا ١٠ مرات.
بقوله شكلها إيه؟
قالي بودر بتخلط في التبغ والكيس بـ ٤٠ جنيه وبيعمل سجارتين.
ما هو الكيتامين؟
مخدر البودر هو الأكثر انتشارا بين صغار السن هذه الأيام، وبشوف حالاتها أكثر من الحشيش!
المادة الفعالة اللي في البودر، هي مادة مخدرة عبارة عن سائل أبيض اسمها كيتامين، تستخدم في التخدير، وممكن تدخن أو تستنشق أو يتم حقنها.
الكيتامين يقال عنه Precursor أي مادة أولية تستخدم في صنع مخدرات أخرى، وله استخدامات طبية ويتم تهريبه وبيعه في السوق السوداء.
ماذا يفعل مخدر البودر؟
في الجرعات القليلة منه، يؤثر على التركيز والذاكرة ومهارات التعلم..
بالمناسبة الشاب بيشتكى لي إنه مش عارف يذاكر وبينسى، وعنده امتحان بعد يومين.
الجرعات العالية منه بتعمل هذيان وفقدان للذاكرة، وتضعف وظائف الحركة زي المشي، وتسبب اكتئاب وارتفاع ضغط الدم، وأيضا مشاكل في التنفس تؤدي إلى الوفاة.
هل يظهر مخدر البودر في التحاليل؟
طبعا تأثيره المهلوس في الجرعات العالية معروف جدا ويشبه مادة اسمها phencyclidine
مادة مهلوسة مشهورة منتشرة جدا بين الشباب سواء صغار السن أو الكبار.
بخلاف رخص سعرها وأنها مش بتظهر في التحاليل، وده مناسب للشباب الصغيرين، لكن تأثيرها خطير جدا ويؤدي إلى تدهور سريع، خصوصا في الوظائف المعرفية؛
الذاكرة والتركيز والقدرة على التعلم، ونوبات الهلاوس والذهان!
في رأيي أنه حدث تغيير في تركيبة الدماغ، أيام الحشيش “الجميل”!
والدماغ الخفيفة ولّت وراحت! وأصبح معظم صغار السن وحتى الشباب بيفضلوا الدماغ دي، دماغ الفصلان والهلاوس والتريب Trip..
في نقطتين مهمين:
ممكن حد يقولي بس من زمان فيه مواد مهلوسة زي الصراصير والباركنيول…
ده حقيقي..
لكن أنا بتكلم عن ظاهرة، وليس عن أعداد قليلة، ظاهرة جديدة، تغيير في تركيبة الدماغ، ميل للدماغ التقيلة والفصلان والهلوسة!
وبعدين زمان كانوا بياخدوا حبوب الهلوسة علشان مفيش حشيش أو لأنه كان غالي وهو مش معاه فلوس… إنما الشاب ده مثلا ظروفه كويسة وماعندوش مشاكل مادية!
آخر حاجة..
خطورة الأمر ده على الشباب الصغيرين والمراهقين، إنهم مش هيكملوا تعليم؛ بسبب تأثير المواد دي على الدماغ، ومش بعيد يتاجروا في المخدرات، ده غير المخاطر النفسية زي الاكتئاب ونوبات الذهان..
وآخر حاجة المخاطر الصحية، واللي لسه محدش عارف عنها حاجة، المواد دي بتأثر على إيه أو بتبوظ إيه في الجسم!
